କଟକ ବଡ଼ ଡାକ୍ତରଖାନା ଆଇସିୟୁରେ ପୋଡ଼ିହୋଇ ରୋଗୀ ମୃତ୍ୟୁ ପ୍ରତିବାଦରେ ଏସ୍ୟୁସିଆଇ(କମ୍ୟୁନିଷ୍ଟ) ପକ୍ଷରୁ ବିକ୍ଷୋଭ
Dated – 16.03.2026 –
ରାଜ୍ୟର ସବୁଠାରୁ ବଡ଼ ଓ ସର୍ବପୁରାତନ ଡାକ୍ତରଖାନା କଟକ ବଡ ଡାକ୍ତରଖାନା ଆଇସିୟୁରେ ପୋଡିହୋଇ ୧୩ ଜଣ ଗୁରୁତର ରୋଗୀଙ୍କ ମୃତ୍ୟୁ ଭଳି ମର୍ମନ୍ତୁଦ ଓ ହୃଦୟ ବିଦାରକ ଘଟଣାରେ ଏସୟୁସିଆଇ(କମ୍ୟୁନିଷ୍ଟ) ପକ୍ଷରୁ ଗଭୀର ଉଦ୍ବେଗ ପ୍ରକାଶ କରାଯାଇଛି । ମୃତ ବ୍ୟକ୍ତି ମାନଙ୍କ ପ୍ରତି ଗଭୀର ଶ୍ରଦ୍ଧାଞ୍ଜଳି ଜ୍ଞାପନ କରାଯିବା ସହିତ ଗୁରୁତର ଭାବରେ ଆହତ ମାନଙ୍କର ଆଶୁ ଆରୋଗ୍ୟ କାମନା କରାଯାଇଛି । ପାର୍ଟି ପକ୍ଷରୁ କୁହାଯାଇଛି ଯେ ଏହା ଏକ ଅପ୍ରତ୍ୟାଶିତ ଘଟଣା କିମ୍ବା ଦୁର୍ଘଟଣା ନୁହେଁ । ଦଶନ୍ଧି ଦଶନ୍ଧି ଧରି ଯୋଜନାବଦ୍ଧ ସରକାରୀ ଅବହେଳା ଯୋଗୁ ଡାକ୍ତରଖାନାରେ ବାରବାର ଏହି ଧରଣର ଘଟଣା ଘଟୁଛି । ମାତ୍ର ଡାକ୍ତରଖାନାର ମୂଳ ସମସ୍ୟାର ସମାଧାନ କରିବାପାଇଁ ରାଜ୍ୟ ବିଜେପି ସରକାର ବିହିତ ପଦକ୍ଷେପ ଗ୍ରହଣ କରୁନାହାନ୍ତି । ଅନ୍ୟପଟରେ ପରିକଳ୍ପିତ ଭାବରେ ଡାକ୍ତରଖାନାକୁ ରୁଗ୍ଣ କରାଯାଉଛି ।
ଏହି ପୃଷ୍ଠଭୂମିରେ ଡାକ୍ତରଖାନା ଆଇସିୟୁରେ ପୋଡ଼ି ହୋଇ ରୋଗୀ ମରିବା ଭଳି ଏହି ମର୍ମନ୍ତୁଦ ଘଟଣା ବ୍ୟବସ୍ଥାଗତ ହତ୍ୟାକାଣ୍ଡ ବୋଲି ସ୍ପଷ୍ଟ ହେଉଛି ।
ଏହି ପରିସ୍ଥିତିରେ ଭୟାବୟ ଅଗ୍ନିକାଣ୍ଡ ଓ ଜୀବନହାନୀ ପାଇଁ ରାଜ୍ୟ ସ୍ୱାସ୍ଥ୍ୟ ମନ୍ତ୍ରୀ ତୁରନ୍ତ ଇସ୍ତଫା, ପ୍ରତ୍ୟେକ ମୃତ ବ୍ୟକ୍ତିଙ୍କ ପରିବାରକୁ ଅତି କମରେ ୧ କୋଟି ଓ ଗୁରୁତର ଭାବରେ ଆହତ ମାନଙ୍କୁ ୫୦ ଲକ୍ଷ ଟଙ୍କା ସହାୟତା ପ୍ରଦାନ, ବଡ଼ ମେଡିକାଲରେ ଉପଯୁକ୍ତ ଚିକିତ୍ସା ପାଇଁ ଆବଶ୍ୟକ ସଂଖ୍ୟକ ସ୍ଥାୟୀ ଡାକ୍ତର, ନର୍ସ ଓ ଅନ୍ୟାନ୍ୟ କର୍ମଚାରୀ ନିଯୁକ୍ତି, ଆଉଟ୍ ସୋର୍ସିଙ୍ଗ ବ୍ୟବସ୍ଥା ସମ୍ପୂର୍ଣ୍ଣ ବାତିଲ ଓ ଲଗାତାର ଅବ୍ୟବସ୍ଥା ଓ ଅଗ୍ନିକାଣ୍ଡ ପାଇଁ ଦାୟୀ ସମସ୍ତ ଅଧିକାରୀଙ୍କ ବିରୁଦ୍ଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ ଦାବିରେ ମାର୍ଚ୍ଚ ୧୬ ତାରିଖରେ ଡାକ୍ତରଖାନା ସମ୍ମୁଖରେ ପାର୍ଟି ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଛି । ଜିଲ୍ଲା ସମ୍ପାଦକ ବିଶ୍ୱାବସୁ ଦାସଙ୍କ ନେତୃତ୍ୱରେ ଅନୁଷ୍ଠିତ ଏହି ବିକ୍ଷୋଭରେ ଖଗେଶ୍ୱର ସେଠୀ, ବବି ବଳବନ୍ତରାୟ, ସିଦ୍ଧାର୍ଥ ରଥ, ବସନ୍ତ ନାୟକ, ଭଗ୍ୟରବି ଦାସ, ଦୀପକ ଦାସ, ବିନୋଦ ସେଠୀ, ତରୁଣସେନ୍ ନାୟକ, ଇଶା ଧର, ସ୍ୱାଧିନୀ ବେହେରା, ଶିବାନୀ ସାହୁ, ଅକ୍ଷୟ ରାଉଳ, ଶୁଭସ୍ମିତା ସାହୁ, ଅମରେନ୍ଦ୍ର ନାୟକ, ପ୍ରତାପ ମିଶ୍ର, ଜ୍ୟୋସ୍ନା ଦାସ, ସିପ୍ରା ମହାନ୍ତି ସୁଜାତା ମହାପାତ୍ର ପ୍ରମୁଖ ନେତୃତ୍ୱ ନେଇଥିଲେ ।